Bütün dünya savaşları yorular durar,siz qalxan savaşlar yorulmaz

Yüz ildən artıq bir dövrdə, minlərlə qurban verə-verə
azadlıq mübarizəsi aparan Güneyli bacı-qardaşlarımıza,
qürur tariximizi yazanlara


Bir cana min yol fərman verilər,
min yol dar ağacı qurular,
bir boyun da min yol vurular,
fərman verən dillər yorular,
boyun vuran əllər yorular,
min illər ayaqüstə, haqdan
nəğmə diləyən başsız bədənlər,
vurulub düşdüyü yerdə
nəğmə deyən başlar yorulmaz.
Yorular qısmalar, boğmalar,
heç yorulmazkən yorular
sizlərə ağlayan doğmalar,
sizlərə qoşulan nəğmələr,
ancaq sizə dəycək, toxuncaq,
siz oxuduğunuzdan da bərkdən
siz deyən nəğmələri deməkdən
siz asılan dar ağacları,
sizi döyən dəyənəklər,
sizə dəyən daşlar yorulmaz.
Bilmirəm, Tanrım necə edər,
çiynimizi necə becərər,
bircəcə anda çiynimizdən
vurulandan daha gözəl
boyunlar, başlar cücərər,
üzlər, gözlər, qaşlar cücərər,
bir gün ruh da bədəndə yorular,
qurbanlardan vətən də yorular,
ancaq vətənçün vurulmağa
boy atan boyunlar, başlar,
üzlər, gözlər, qaşlar yorulmaz.
Dünya ancaq eşqlə yeni olar,
qatılaşar, eşqlə durular,
bir doğma anadan doğulanlar
bir-birini sevməkdən yorular,
ancaq vətən eşqindən doğulan,
doğmalardan da doğma olan,
doğulcaq bayraqlarla qalxan
əsl bacı-qardaşlar yorulmaz,
bütün savaşlar yorular, durar,
siz verən savaşlar yorulmaz.

Vaqif Bayatlı Odər

Bu yazı ( 579 ) - dəfə oxunmuşdur