Millət vəkili: “Dünyanın bəzi ölkələri var ki,gerçəkləri görmək istəmir və qondarma erməni soyqırımı ilə bağlı qərarlar qəbul edirlər”
00:42 / 26.04.2012
Millət vəkili Qənirə Paşayeva Strasburqdan, AŞPA-nın binasından Türkiyənin TRT HABER , TRT AVAZ kanallarının canlı yayımında qondarma erməni soyqırımı iddialarına qarşı Türk dünyasının birgə mübarizəsinin vacibliyindən danışıb. Türkiyənin TRT HABER , TRT AVAZ kanallarının canlı yayımında çıxışında millət vəkili bildirib ki, Türk milləti heç bir zaman heç bir millətə, o cümlədən ermənilərə qarşı heç bir soyqırım həyata keçirməyib:
“Osmanlı imperiyası 500 il ərzində böyük bir coğrafi məkanı idarə edib. Amma 500 il sonra Osmanlı imperiyasından çıxan bütün xalqlar öz dillərinə, dinlərinə sahib olaraq çıxdılar. Osmanlı heç kimin nə dilinə, nə də dininə toxunub, bu bir tarixi gerçəklikdir” – deyə, millət vəkili qeyd edib. Millət vəkili Türkiyənin öz tarixini bütün çılpaqlığı ilə ortaya qoymağa hazır olduğunu bildirib:
“Türkiyənin Baş naziri Rəcəb Tayyib Ərdoğan Ermənistana bütün arxivlərin açılması və tarixçilərdən ibarət bir komissiyanın yaradılması təklifi ilə çıxış etdi, amma Ermənistan və erməni diasporu qəbul etmədi. Çünki o zaman bütün gerçəklər ortaya çıxacaq ”.
Millət vəkili 20-ci əsrin əvvəlində ermənilərin həm Anadolu, həm də Azərbaycan torpaqlarında, 20-ci əsrin sonunda müasir dünyanın gözləri qarşısında Ermənistanın işğal etdiyi Azərbaycan torpaqlarında törətdiyi qətliamlar, soyqırımlardan danışıb və bildirib ki, dünyanın bəzi ölkələri var ki, gerçəkləri görmək istəmir və qondarma erməni soyqırımı ilə bağlı qərarlar qəbul edirlər: “Bu yalanların qarşısının alınmasının tək bir yolu – birlikdə mübarizəmizi daha da gücləndirmək və həqiqətləri dünyaya birlikdə daha da geniş yaymaq. Qondarma erməni soyqırımı iddialarına qarşı mübarizə və Qarabağ probleminin həlli harada doğulub harada yaşamasından asılı olmayaraq bütün türklərin əsas məsələsi olmalıdır. Biz bu iddiaların qarşısını almaq üçün həqiqətləri, gerçəkləri bütün dünyaya daha geniş şəkildə çatdırmalıyıq” – deyə, millət vəkili əlavə edib.
Bu məsələdə türk gəncliyinin üzərinə böyük vəzifə düşdüyünü qeyd edən millət vəkili bütün türk gəncliyini sosial mediada, virtual aləmdə fəal olmağa çağırıb və qondarma erməni soyqırımı iddialarına qarşı mübarizədə sosial mediada səylərin artırılmasının, həqiqətlərin daha geniş şəkildə yayılması işinin sürətləndirilməsinin vacibliyini qeyd edib. Millət vəkili bu il Şuşa və Laçının Ermənistan silahlı qüvvələri tərəfindən işğalının 20-ci ilinin tamam olduğunu diqqətə çatdırıb və Ermənistanın bu ərazilərdə, o cümlədən işğal etdiyi digər Azərbaycan torpaqlarında törətdiyi vandalizm aktları, azərbaycanlıların milli-mədəni irs abidələrinin, qəbiristanlıqlarının dağıdılması, dinc əhaliyə qarşı apardığı soyqırımlar haqqında da danışıb.
KAMİL
Bu yazı ( 93 ) - dəfə oxunmuşdur
