Bakıda “Tələbələr azad sahibkarlıq fəaliyyətində” proqramı üzrə konfrans keçiriləcək
00:51 / 10.03.2012
Gənclər və İdman Nazirliyinin təşkilatçılığı ilə martın 11-dən Bakıda “Tələbələr azad sahibkarlıq fəaliyyətində (SİFE)” beynəlxalq proqram üzrə “SİFE SİLK ROAD” liderlərin beynəlxalq konfransı başlayacaq. Nazirliyin mətbuat xidmətindən verilən məlumata görə, konfransda Rusiya, Azərbaycan, Qazaxıstan, Qırğızıstan və Tacikistan komandaları, o cümlədən “SİFE Worldwide” beynəlxalq təşkilatının prezidenti Elvin Rohrs və onun müavinlərinin iştirakı nəzərdə tutulub. Beynəlxalq konfrans çərçivəsində region ölkələrini təmsil edən tələbə komandaları həyata keçirilən layihələrə dair təqdimatlar aparacaq və SİFE proqramının qlobal prioritet istiqamətləri üzrə birgə layihələrin hazırlanması üzərində çalışacaqlar. Konfrans zamanı “Biznes liderlərin gənclərlə görüşü” forumu keçiriləcək və müzakirə olunacaq əsas mövzu gənclərin sahibkarlıq fəaliyyətinin dəstəklənməsi və məşğulluq imkanlarının artırılması olacaqdır. Tədbirin yekununda region ölkələrini təmsil edən 20 ali təhsil məktəbinin SİFE komandaları öz aralarında əməkdaşlıq haqqında memorandum imzalayacaq. Məlumatda bildirilib ki, “SİFE” dünyanın 39 ölkəsinin 1600 universitetini və 50 000-dən artıq tələbəsini özündə birləşdirən beynəlxalq proqramdır. SİFE proqramının əsası 1975-ci ildə ABŞ universitetləri tərəfindən qoyulub və 1996-cı ildən bir çox ölkələrdə proqram üzrə milli yarışların keçirilməsinə başlanılıb. Proqram üzrə Dünya Kuboku yarışları 2001-ci ildən keçirilir. Azərbaycan komandaları isə bu yarışlarda 2006-cı ildən iştirak edir. SİFE proqramı üzrə yarışların keçirilməsində əsas məqsəd sahibkarlıq fəaliyyətinə gəncləri təşviq etmək, azad sahibkarlığın ideyasını tələbələr arasında təbliğ etmək, tələbələrin təşkilatçılıq, idarəçilik və komandada işləmək bacarıqlarını inkişaf etdirməkdir.
S.QARAYEVABu yazı ( 195 ) - dəfə oxunmuşdur
