“Azərbaycanda xaricidilli KİV-in durumu: problemlər və inkişaf perspektivləri” müzakirə olunub
01:43 / 03.03.2012
Dünən Azərbaycan Dillər Universitetində (ADU) universitetin İctimaiyyətlə əlaqələr və Mətbuat xidməti şöbəsinin yaranmasının 3 illiyinə həsr olunmuş “Azərbaycanda xaricidilli KİV-in durumu: problemlər və inkişaf perspektivləri” mövzusunda dəyirmi masa keçirilib. ADU-nun İctimaiyyətlə əlaqələr və Mətbuat xidmətinin və Azərbaycan Mətbuat Şurasının birgə təşkilatçılığı ilə keçirilən dəyirmi masada Azərbaycan Mətbuat Şurasının sədri Əflatun Amaşov, “Ayna-Zerkalo” qəzetinin baş redaktoru Elçin Şıxlı, Beynəlxalq Avrasiya Mətbuat Fondunun sədri Umud Mirzəyev, “525-ci qəzet”in baş redaktoru Rəşad Məcid, “Şərq” qəzetinin baş redaktoru Akif Aşırlı, “Zaman-Azərbaycan” qəzetinin baş direktoru Süleyman Ünal, “Novaya Vremya” qəzetinin baş redaktoru Şakir Ağayev, “Pillələr” qəzetinin baş redaktoru Şöhlət Abbas, “Bakı xəbər” qəzetinin baş redaktoru Aydın Quliyev, “Xalq Cəbhəsi” qəzetinin baş redaktoru Elçin Mirzəbəyli, AZTV-nin “NIGHT NEWS” proqramının baş redaktoru Şaiq Məmmədov, “ATV İnternational” telekanalının baş redaktoru Azər Xəlilov və ölkənin aparıcı KİV nümayəndələri iştirak ediblər. Azərbaycanda xaricidilli mətbuatın vəziyyətinin əsas müzakirə mövzusu olduğu dəyirmi masada Azərbaycan Mətbuat Şurasının sədri Əflatun Amaşov çıxış edərək Azərbaycanda 50-ə yaxın xaricidilli KİV-in qeydiyyatdan keçdiyini bildirib. Xaricidilli mətbuatın fəaliyyətinə toxunan Ə.Amaşov rus dilində yayımlanan nəşrlərin üstünlük təşkil etdiyini vurğulayıb. Azərbaycanda əcnəbi dilli mətbuatın tarixinə ekskurs edən Mətbuat Şirasının sədri bildirib ki, Azərbaycanda ilk xaricidilli nəşri 1828-ci ildə nəşr olunan “Tiflisskiye vedomosti” qəzeti hesab etmək olar. Əsrin əvvəllərində nəşr olunan “Kaspi” qəzetinin fəaliyyətindən bəhs edən Ə.Amaşov mətbu orqanın müstəqillik məfkurəsinin formalaşmasında böyük rol oynadığını diqqətə çatdırıb. Mətbuat Şurasının sədri Azərbaycan həqiqətlərinin dünyaya çatdırılmasında xaricidilli nəşrlərin önəmli əhəmiyyətə malik olduğundan da söhbət açıb. ADU-nun rektoru, millət vəkili, professor Səməd Seyidov rəhbərlik etdiyi universitetdə belə bir mötəbər tədbirin keçirilməsindən məmnun olduğunu bildirib. S.Seyidov universitetin media ilə əlaqələrinin getdikcə genişləndiyini və sıx əməkdaşlıq tellərinin yarandığını qonaqların diqqətinə çatdırıb. Jurnalistikaya düzgün qiymət verilməyin vacibliyini vurğulayan S.Seyidov ictimai fikrin formalaşmasında mətbuatın roluna da toxunub: “Jurnalistika bir elmdir. Dünya jurnalistikasına inteqrasiya etmək vacibdir. Fikir, ideya Azərbaycan xalqının olmalı, həqiqətlərin çatdırılması isə dünyada mövcud olan üslub vasitəsilə həyata keçirilməlidir”. ADU-nun rektoru eyni zamanda, dünya ilə əlaqələrin qurulmasında, lazımi məlumatların keyfiyyətli şəkildə ötürülməsində dilin mühüm əhəmiyyət kəsb etdiyini qeyd edib. Rektor media mənsublarına dünyanın aparıcı KİV-lərinin təcrübəsindən yararlanmağı tövsiyə edib. Rəhbərlik etdiyi universitetdə 14 dilin tədris olunduğunu deyən S.Seyidov 2012-2013-cü il tədris ilində Filologiya fakültəsində Jurnalistika ixtisasının açılacağını da vurğulayıb. O, bu sahədə Azərbaycanın aparıcı media orqanları ilə əməkdaşlıq ediləcəyindən əmin olduğunu deyib. “Ayna-Zerkalo” qəzetinin baş redaktoru Elçin Şıxlı isə çıxışında Azərbaycanda rusdilli mətbuatın durumundan söhbət açıb. Baş redaktoru olduğu qəzetin inkişaf tarixindən danışan E.Şıxlı rus dilində nəşr olunan mətbuatın ictimai fikrin formalaşmasına təsir etdiyini bildirərək Azərbaycan reallıqlarının ədalətli həll olması, həqiqətlərin dünyaya düzgün çatdırılmasında xaricidilli mətbuatın da töhfə verdiyini nəzərə çatdırıb. O, rus dilinin dünyada qəbul olunan dillərdən biri olduğuna da diqqətə çəkib. “Azernews” qəzetinin baş redaktoru Fazil Abbasov isə çıxışında Azərbaycanda nəşr olunan ingilis dilli nəşrlərin fəaliyyətindən bəhs edib. O, Azərbaycanda xaricidilli mətbuatın formalaşması dövrünün müstəqillikdən sonrakı illərə təsadüf etdiyini söyləyib. Fazil Abbasov rəhbərlik etdiyi qəzetin 1997-ci ildən nəşr olunduğunu və ilk ingilis dilli qəzet olduğunu deyib. O, əsas məqsədlərinin əcnəbi vətəndaşlara Azərbaycanda baş verən proseslər haqqında düzgün informasiya çatdırmaq olduğunu qeyd edib. Cənubi Qafqazda fəaliyyət göstərən Beynəlxalq İnformasiya Mərkəzi ilə əməkdaşlıq etdiklərini bildirən F. Abbasov qurum vasitəsilə nəşrin qonşu ölkələrə də yayıldığını vurğulayıb. Baş redaktor bildirib ki, əcnəbi dili kadrların yetişməsində ADU-nun xüsusi rolu var. ADU-nun İctimaiyyətlə əlaqələr və Mətbuat xidmətinin rəhbəri, fransızdilli “Le Carrefour” qəzetinin baş redaktoru Zeynab Kazımova xarici dildə nəşr olunan mətbuata ehtiyac oldunu bildirərək, baş redaktoru olduğu qəzetin yaranma tarixindən, eləcə də inkişaf perspektivlərindən danışıb. O, “Le Carrefour” qəzetinin Azərbaycanda yeganə fransızdilli qəzet olduğunu qonaqların diqqətinə çatdırıb. Baş redaktor əsas məqsədlərinin Azərbaycan və Fransa, eyni zamanda fransızdilli ölkələr arasında mədəni, iqtisadi, elmi əlaqələri inkişaf etdirmək, fransızlari və ümumilikdə əcnəbiləri ölkəmizdə baş verən sosial-ictimai, mədəni, iqtisadi hadisələr barədə məlumatlandırmaq, onlara öz dillərində informasiya verməklə Azərbaycan həqiqətlərini dünya ictimaiyyətinə çatdırmaq, həmçinin Azərbaycanı Fransada və fransızdilli ölkələrdə tanıtmaq olduğunu vurğulayıb. Azərbaycan tarixi, mədəniyyəti, musiqisi, təbiəti ilə bağlı məqalələr verməklə milli-mənəvi dəyərlərimizi təbliğ etməyin də məqsədləri sırasında olduğunu sözlərinə əlavə edib. Digər çıxış edənlər- “Novaya Vremya” qəzetinin baş redaktoru Şakir Ağayev, ADU-nun Filologiya fakültəsinin dekanı, professor Fikrət Cahangirov, “525-ci qəzet”in baş redaktoru Rəşad Məcid, “Pillələr” qəzetinin baş redaktoru Şöhlət Abbas, “Trend” İnformasiya agentliyinin baş direktorunun müavini Elçin Hüseynov, AZTV-nin “NIGHT NEWS” proqramının baş redaktoru Şaiq Məmmədov və “ATV İnternational” telekanalının baş redaktoru Azər Xəlilov Azərbaycanda mövcud olan əcnəbi dilli KİV-nin fəaliyyətindən söz açıblar. Dəyirmi masa müzakirələrlə yekunlaşıb.
Sevinc QARAYEVABu yazı ( 76 ) - dəfə oxunmuşdur
