Sulutəpə hadisəsinə görə araşdırma yekunlaşdı
“ZERKALO” QƏZETİNİN ƏMƏKDAŞI İDRAK ABBASOVUN HANSI SƏBƏBDƏN VƏ KİM TƏRƏFİNDƏN XƏSARƏT ALMASI FAKTININ ARAŞDIRILMASINA XÜSUSİ DİQQƏT YETİRİLİB
00:43 / 24.05.2012
Bakının Binəqədi rayonunun Sulutəpə ərazisində bu il aprelin 18-də baş vermiş hadisələrlə bağlı Azərbaycan Respublikası Dövlət Neft Şirkətində (ARDNŞ) yaradılmış komissiyadan açıqlama verilib. APA-nın xəbərinə görə, şirkətin hüquq idarəsinin rəisi, komissiyanın üzvü Eldar Orucov bildirib ki, komissiya öz səlahiyyətləri çərçivəsində baş vermiş hadisənin təfərrüatlarını araşdırıb. O deyib ki, “Zerkalo” qəzetinin əməkdaşı İdrak Abbasovun hansı səbəbdən və kim tərəfindən xəsarət alması faktının araşdırılmasına xüsusi diqqət yetirilib. E. Orucovun dediyinə görə, ARDNŞ-nin Təhlükəsizlik İdarəsinin (Tİ) Sulutəpədə keçirdiyi tədbirdə iştirak etmiş əməkdaşları ilə söhbətlər aparılıb, hadisə ilə bağlı ətraflı məlumat toplanılıb və iştirakçıların izahatları alınıb.
İdarə rəisi qeyd edib ki, ARDNŞ nümayəndələri iki dəfə İ.Abbasovun müalicə aldığı xəstəxanada ona baş çəkib, onunla söhbət ediblər: “ Söhbətin əsas məqsədi İdrak Abbasovun hansı şəraitdə xəsarət alması, tərəflər arasında münaqişənin hansı zəmində yaranması, jurnalistə xəsarət yetirilməsində ARDNŞ əməkdaşlarının iştirak dərəcəsi və s. məsələlərin aydınlaşdırılması olub. Onunla birlikdə hadisəni əks etdirən müxtəlif fotoşəkillər, video-materiallar diqqətlə nəzərdən keçirilib. Həmin gün İdrak Abbasovu ziyarətə gələn “Yeni Müsavat” qəzetinin əməkdaşı Günay Musayeva da qeyd olunan materialları izləyib və hadisənin şahidi kimi müəyyən şəxslərin kimliyini xatırlamağa çalışıb. Jurnalistlərin iştirakı ilə baş verən hadisələr təhlil edilib, onların bildirdikləri ARDNŞ əməkdaşlarının verdiyi izahatlarla müqayisə olunub, həqiqətin üzə çıxarılması istiqamətində araşdırmalar aparılıb”.
İdarə rəisi deyib ki, İ.Abbasovun şübləhəndiyi ARDNŞ Tİ-nin iki əməkdaşından da izahat alınıb: “Müəyyən edilib ki, həmin şəxslərlə jurnalist İdrak Abbasov, onun yaxın qohumları, eləcə də qəsəbə sakinləri arasında münaqişə yaranıb və nəticədə həm ARDNŞ əməkdaşları, həm də İdrak Abbasov müxtəlif dərəcəli xəsarətlər alıb. Təhlükəsizlik İdarəsinin iki əməkdaşı izahatında qeyd edib ki, İdrak Abbasov onların ünvanına çoxsaylı söyüşlər, ağır təhqirlər və yerli camaatı münaqişəyə çağıran ifadələr işlədib, az sonra onun qardaşı və bir neçə nəfər də hadisə yerinə gəlib və münaqişəyə qoşulub. Bəzi sakinlər Təhlükəsizlik İdarəsinin əməkdaşlarına daş və digər əşyalar atıblar. Bununla da gərginlik yüksək həddə çatıb və Təhlükəsizlik İdarəsinin əməkdaşları ilə İdrak Abbasovun da içərisində olduğu qrup arasında dava başlayıb. İzahatı alınan əməkdaşlar İdrak Abbasovun konkret kim tərəfindən vurulduğunu xatırlaya bilməyiblər, bunu həmin anda həm dava etdikləri, həm də müdafiə olunduqları ilə izah ediblər”.
E. Orucov deyib ki, araşdırma zamanı dava baş vermiş ərazidə İdrak Abbasovun, onun atasının və qardaşının qanunsuz tikililəri olduğu da müəyyənləşib: “İzahatları alınan işçilərin verdiyi məlumatlara əsasən, İdrak Abbasovun həmin ərazidə vaxtaşırı çəkiliş aparmaq istəyi heç də onun jurnalist fəaliyyəti ilə bağlı olmayıb, şəxsi maraqlarına xidmət edib. Belə ki, hadisədən əvvəlki tarixlərdə də o, əhalini zorakılığa çağırmaq, şəxsi mənafeyi naminə kütləvi qarışıqlıq yaratmaq məqsədləri ilə tez-tez Sulutəpə ərazisində olub”.
Hüquq İdarəsinin rəisi deyib ki, onlar həmin ərazilərin ARDNŞ-ə məxsus olması ilə bağlı dəfələrlə əraziyə media nümayəndələri ilə səfərlər təşkil ediblər, bu səfərlərin bir çoxunda İ. Abbasov da jurnalist kimi iştirak edib: “Bu məsələlər haqqında kifayət qədər məlumatlı olmasına baxmayaraq, İdrak Abbasov tərəfindən jurnalist peşəsi ilə bir araya sığmayan hərəkətlərə yol verilməsi, onun şəxsi məqsədləri üçün əhalini zorakılığa səsləməsi, təhqiramiz ifadələr işlətməsi jurnalist etikası baxımından dərin təəssüf doğurur”.
E. Orucov onu da qeyd edib ki, insident zamanı “ARDNŞ-in Tİ-nin əməkdaşlarına daşlar, içərisi benzinlə dolu şüşələr atılıb, xüsusi hazırlanmış atlı süvarilər onların üsərinə hücum çəkıblər”.
İdarə rəisi bu hadisələrdən sonra ARDNŞ əməkdaşlarının ərazini tərk etdiyini, onların bəzilərinin baş və bədənlərinin müxtəlif yerlərindən xəsarət aldıqlarını bildirib.
ARDNŞ rəsmisi bildirib ki, şirkət rəhbərliyi komissiyanın topladığı bütün materialları hüquq-mühafizə orqanına təqdim edib.
E. Orucovun sözlərinə görə, Sulutəpədə baş vermiş hadisə ilə bağlı daxili işlər orqanları tərəfindən cinayət işi başlanılıb, Daxili İşlər Nazirliyi istintaq aparır.
E.Orucov qeyd edib ki, onların məsələ ilə bağlı mövqeyi dəyişməz qalır: “ARDNŞ hər cür zorakılığı pisləyir, belə halların öz əməkdaşları tərəfindən meydana gəlməməsi üçün bütün lazımi tədbirləri həyata keçirir. Sulutəpə ərazisində baş verən hadisədən sonra Tİ əməkdaşları ilə bir daha maarifləndirici işlər aparılıb, onlara qanunvericiliyə ciddi əməl etmələri, münaqişəli hallarda maksimum həssas olmaları tapşırılıb”. O da qeyd edilib ki, komissiya gələcəkdə qanunsuz tikililərin qarşısının alınmasında mövcud şirkətdaxili normativ sənədlərə müəyyən dəyişikliklər edilməsi ilə bağlı hazırladığı tövsiyyələri ARDNŞ prezidentinə təqdim edib.
ARDNŞ həmçinin mədən ərazilərində yarımçıq tikililərin bundan sonra məhkəmə vasitəsilə mübahisələndirilməsi işini daha kütləvi şəkildə davam etdirmək məqsədi ilə Binəqədi rayon icra hakimiyyətinə nümayəndə ayrılması üçün müraciət edib: “ARDNŞ sahibliyində olan torpaq sahələrinin hüdudlarındakı ərazilərə dair verilmiş bələdiyyə qərarlarını məhkəmə qaydasında mübahisələndirmək üçün aidiyyəti bələdiyyələrə də müraciət edib və həmin qərarların surətlərini istəyib”.
E.Orucov deyib ki, onlar bundan sonra da sənədi olmayan yarımçıq tikintilərin qarşısının alınmasında qətiyyət göstərəcək, Tİ əməkdaşlarının işini daha sistemli, operativ təşkil etmək üçün lazımi tədbirləri görəcəklər: “Mədən ərazilərində qanunsuz aparılan tikinti işlərinin qarşısı alınacaq. Bundan başqa, görülən tədbirlər çərçivəsində qanunsuz tikililərlə bağlı işlərin məhkəmə qaydasında aparılması istiqamətində də tədbirlər genişləndiriləcək. ARDNŞ öz sahiblik hüquqlarını özgələrinin qanunsuz hərəkətlərindən qorumaq üçün lazımi addımlar atır və bundan sonra da atacaq”.
E. Orucov bildirib ki, bundan sonra ərazinin daxil olduğu icra hakimiyyətinin nümayəndəsi ilə birlikdə yarımçıq tikili müəyyən edildikdə dərhal akt tərtib olunacaq, tikinti işləri aparanın şəxsiyyətinin müəyyən edilməsi üçün tədbirlər görüləcək: “ Tikintini aparanın şəxsiyyəti müəyyənləşəcəyi halda mübahisə baxılması üçün aidiyyəti məhkəməyə göndəriləcək, onun şəxsiyyəti müəyyən edilməzsə, ARDNŞ mülki qanunvericiliyin tələbinə görə öz sahiblik hüquqlarının müdafiəsi üçün yarımçıq tikili barəsində lazımi tədbirlər görəcək”. İdarə rəisi deyib ki, görülən tədbirlər şirkətin daimi istifadəsinə verilmiş torpaq sahələrinə dair sahiblik hüququnun müdafiəsi ilə əlaqədardır və ölkə qanunvericiliyinin yol verdiyi hədlərdə hərəkət edilir: “Zəbt olunmuş ərazilərdə böyük həcmli karbohidrogen ehtiyatları mövcuddur. Digər tərəfdən, həmin ərazilərin yaşayış üçün istifadə edilməsi əhalinin sağlamlığının qorunması və təhlükəsizliyi baxımından qeyri-məqbul hesab edilir və buna görə də bu ərazilər qanunvericiliklə yaşayış məntəqələrinin salınması üçün nəzərdə tutulmayıb.
ARDNŞ tərəfindən həyata keçirilən tədbirlər vətəndaşlarımızın sağlamlığına və təhlükəsizliyinə mənfi təsir göstərən həmin sənaye təyinatlı torpaq sahələrində məskunlaşmanın və ayrı-ayrı şəxslər tərəfindən qanunsuz tikililər inşa edilməsinin qarşısının alınmasına yönəlib. Nəzərə alınmalıdır ki, həmin ərazilərdə neft-qaz əməliyyatlarının aparılmasına dair ARDNŞ ilə xarici investorlar arasında Hasilatın Pay Bölgüsü üzrə Sazişlər imzalanıb, Milli Məclis tərəfindən patifikasiya olunub və qanuni qüvvəyə minib. Həmin sazişlərə əsasən, ARDNŞ-in, eləcə də Azərbaycan hökumətinin kontrakt ərazilərində investorların maneəsiz fəaliyyət göstərmələri ilə bağlı öhdəlikləri var”.
Qeyd edək ki, bu il aprelin 19-da ARDNŞ prezidenti Rövnəq Abdullayevin əmri ilə neft-qaz əməliyyatlarının həyata keçirilməsi üçün ARDNŞ-nin daimi istifadəsinə ayrılmış sənaye təyinatlı torpaq sahələrində özbaşına tikililərin qarşısının alınması istiqamətində Binəqədi rayonundakı Sulutəpə ərazisində aprelin 18-də keçirilmiş tədbirlərdə baş vermiş hadisələri, o cümlədən “Zerkalo” qəzetinin əməkdaşı İdrak Abbasovun xəsarət alması faktını araşdırılması üşçün komissiya yaradılıb. Bu gün isə komissiya araşdırmalarının başa çatdığını qeyd edib.
Bu yazı ( 102 ) - dəfə oxunmuşdur
