Səməd Seyidov ABŞ-ın Azərbaycandakı müvəqqəti işlər vəkili ilə görüşüb

Dünən Azərbaycan Dillər Universitetinin (ADU) rektoru, millət vəkili, professor Səməd Seyidovun ABŞ-ın Azərbaycandakı müvəqqəti işlər vəkili Adam Sterlinqlə görüşü olub.
Görüşdə ABŞ-la Azərbaycan əlaqələrinin hazırkı inkişafı, ADU ilə Amerika universitetləri arasında mövcud əməkdaşlıq, Azərbaycan Dillər Universitetindəki Amerika mərkəzinin fəaliyyəti haqda fikir mübadiləsi aparılıb. Səməd Seyidov Azərbaycan - ABŞ münasibətlərinin yüksək səviyyədə olduğunu, ADU-nun ABŞ universitetləri ilə əlaqələrinin bu istiqamətdə inkişaf etdirdiyini deyib. Azərbaycan Dillər Universitetindəkı İnformasiya Resurs Kompleksinin, o cümlədən Amerika mərkəzinin fəaliyyətindən danışan rektor bildirib ki, Amerika mərkəzinin ADU-da yerləşməsi universitetin imicini gücləndirir: “ABŞ-la münasibətlər çox vacib və əhəmiyyətlidir”. Rektor bu sahədə ABŞ-Azərbaycan parlamentlərarası dostluq qrupunun fəaliyyətindən də bəhs edib, eyni zamanda ABŞ səfirliyi ilə Azərbaycan Dillər Universiteti arasında olan əməkdaşlıqdan və ikitərəfli əlaqələrdən məmnun olduğunu dilə gətirib.
Adam Sterlinq ABŞ-Azərbaycan münasibətlərinin inkişafını yüksək qiymətləndirdiyini deyib. Azərbaycanın ABŞ-da təbliği üçün bir sıra layihələrin reallaşdırılmasından əminliyini ifadə edən A. Sterlinq səfirliklə əməkdaşlıq çərçivəsində Azərbaycan Dillər Universitetində bir sıra birgə tədbirlərin keçirilməsindən və tələbələrlə ünsiyyətdən razı qaldığını açıqlayıb.
S.QARAYEVA

---