“Azərikimya” İstehsalat Birliyində təhlükəsizliklə bağlı treninq keçirilib

“Azərikimya” İstehsalat Birliyində istehsalat sahələrində əməyin mühafizəsi və təhlükəsizlik texnikası qaydalarına ciddi əməl edilməsi məqsədilə ardıcıl olaraq praktiki əhəmiyyətli tədbirlər həyata keçirilir. “Azərikimya” İB-dən verilən məlumata görə, təqdimat xarakterli tədbirlərdə təhlükəsizlik qaydalarının pozulması ilə bağlı videobloklar nümayiş etdirilir, onların yaranma səbəbləri və nəticələri mütəxəssislərlə birgə kollektiv şəkildə araşdırılılr.
Bu günlərdə Birliyin Təmir-tikinti İdarəsinin Əməyin mühafizəsi və texniki təhlükəsizlik otağında təmirçi-inşaatçıların, operatorların və digər mütəxəssislərin iştirakı ilə yeni təhlükəsizlik layihəsi üzrə treninq keçirilib. Əvvəlcə kimyaçılara EP-300 kompleksinin susoyutma sexində, mexaniki-quraşdırma və təmir-tikinti sahələrində müşahidə olunan vəziyyətin videoroliki nümayiş etdirilib. Müzakirə edilən xüsusi layihə kimyaçılar tərəfindən böyük marağa səbəb olub. “Təmir-bərpa işləri apararkən risklərin dəyərləndirilməsi proseduru” layihəsi əsasında həyata keçirilən treninq əməyin mühafizəsi baxımından maarifləndirici xüsusiyyəti və əhəmiyyəti ilə yadda qalıb. Təlimatçı-ekspert tərəfindən təqdim olunan mövzu ətrafında geniş fikir mübadiləsi aparılıb və iştirakçılar arasında mövzu ilə bağlı sınaq-yoxlama testi keçirilib.
BƏXTİYAR

---