MTN Zaqatalada növbəti əməliyyat keçirdi
ƏMƏLİYYAT ZAMANI İKİ NƏFƏR SAXLANILDI, SİLAH-SURSAT VƏ PARTLAYICI QURĞULAR GÖTÜRÜLDÜ
00:18 / 14.04.2012
Azərbaycan Milli Təhlükəsizlik Nazirliyi (MTN) Zaqatalada növbəti əməliyyat keçirib. Rayon hüquq-mühafizə orqanlarından APA-ya verilən məlumata görə, həyata keçirilən xüsusi əməliyyat nəticəsində iki nəfər – Mahmud Lələyev və Teymur Qaracayev saxlanılıb. Adıçəkilən şəxslərin evlərindən və pay torpaqlarının ərazisindən silah-sursat və partlayıcı qurğular aşkar edilərək götürülüb.
MTN-in Zaqatalada srağagün tutduğu Mahmud Lələyev nazirliyin bir neçə gün əvvəl həyata keçirdiyi əməliyyat zamanı saxlanılan Bəhruz Lələyevin atasıdır. Gəncə hadisələri zamanı Zaqatalada keçirilən əməliyyat zamanı daha üç nəfər – Mehdi Padarov, Nəsrullah Yunusov və Rəşad adlı şəxslər də tutulublar.
Qeyd edək ki, bu, MTN-in bir neçə gün əvvəl Gəncə və bir sıra rayonlarda həyata keçirdiyi xüsusi əməliyyatın davamıdır. Respublikanın şimal və şimal-qərb bölgəsində əməliyyat davam etdirilir.
Xatırladaq ki, MTN tərəfindən həyata keçirilmiş əməliyyat tədbirləri nəticəsində ölkədə ictimai-siyasi sabitliyi pozmaq və əhali arasında vahimə yaratmaq məqsədilə təxribat-pozuculuq və bir sıra terrorçuluq aksiyalarını planlaşdıran qanunvericiliklə nəzərdə tutulmayan silahlı birləşmənin 17 üzvü ifşa edilərək yaxalanıb. Bakı, Gəncə, Sumqayıt şəhərlərində, eləcə də Qax, Zaqatala, Şəki və Qusar rayonlarında həyata keçirilmiş xüsusi əməliyyat tədbirləri nəticəsində silahlı birləşmənin saxlanılmış üzvlərindən terror-təxribat aksiyalarında istifadəsi nəzərdə tutulan 4 ədəd “AKM” tipli avtomat silah, 1 ədəd “RPK” tipli pulemyot, 2 ədəd “Makarov”, 1 ədəd “Naqan”, 1 ədəd “Steçkin” tipli tapançalar, 2 ədəd “Karabin” tipli tüfəng, 6 ədəd güllə ilə dolu tapança darağı, 300 ədəd müxtəlif çaplı patron, 31 ədəd əl qumbarası, 15 ədəd uzaqdan idarə edilən partlayıcı qurğu, 3 ədəd detonator, külli miqdarda partlayıcı maddə olan plastid, 3 ədəd avtomat silah üçün daraq, 30 ədəd “Kenwood” markalı rabitə aparatı, 3 ədəd süngü bıçağı, terrorçuluğu və cihadı təbliğ edən ədəbiyyat, habelə qanunla qadağan edilmiş xeyli sayda hərbi ləvazimat və digər əşyalar aşkar edilərək götürülüb.
Bildirilib ki, Gəncə şəhərində həyata keçirilmiş əməliyyat tədbirləri zamanı Milli Təhlükəsizlik Nazirliyinin “Qartal” xüsusi təyinatlı dəstəsinin əməkdaşlarına qarşı şiddətli silahlı müqavimət göstərilib. Təslim olmaq barədə qanuni tələbə tabe olmayan şəxslər tərəfindən xüsusi təyinatlılara odlu silahlardan atəşlər açılıb və əl qumbarası atılıb. Nəticədə Milli Təhlükəsizlik Nazirliyinin bir əməkdaşı həlak olub və 3 əməkdaşı müxtəlif dərəcəli bədən xəsarətləri alıb. Xidməti vəzifələrinin yerinə yetirilməsi ilə əlaqədar hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etməklə silahlı müqavimət göstərən şəxslərdən biri məhv edilib, biri yaralanıb, qrupun daha iki üzvü isə yaxalanıb.
Gəncədə keçirilən əməliyyat zamanı zərərsizləşdirilən silahlı, Zaqatalanın Aşağı Tala kənd sakini, 1975-ci il təvəllüdlü Vüqar İsmixan oğlu Padarovdur. V. Padarovun qardaşı Mehdi Padarov isə MTN-in Zaqatalada keçirdiyi əməliyyat zamanı həbs edilib.
Bu yazı ( 237 ) - dəfə oxunmuşdur
